قصيدة (ياوطن)للشاعر مهدي ال حيدر

ياوطن حييـت بالخيـر بعيـون الصبايـا
ما بعد عزتـك عـزة ولا بعـدك رفاعـه
والله ان الشعر ياتي على عـذب السجايـا
كلمـا ابحرنـا لعينـك و فلينـا شـراعـه
فإن كتبنا عن عطايـاك يـا سيـد العطايـا
مزبن اللي ضامه الوقت واضنته المجاعـه
وان كتبنا عن مزايـاك يـا كثـر المزايـا
يكفي ان النور منّك مـلا الدنيـا شعاعـه
قادك رجـال ٍ ليـا وقفـت سـوت سوايـا
نسل شيخ ٍ ما تقاصر على الطولات باعـه
علمونـا ان الوطـن دم و رجالـه خلايـا
و ان من يرخص دمه ما على وجهه شفاعه
ياوطن لا عـز شعـب ٍ تروعـه المنايـا
و المنايا دون حـدك لنـا حـق ٍ و طاعـه
قربوا منّا الدهيـا و حـن سـاس الدهايـا
ما ربينا في ترابك علـى غيـر الشجاعـه
و الحسود اللي حكى فيك شغلـه بالحكايـا
هذي اطباعه ..و اذا ودك انغيـر اطباعـه
من بلانا راح ماعـاد مـن عزمـه بقايـا
قام مـن هجعـة منامـه ايـدور للفراعـه
ياوطنـا والله انّـا علـى صـدق النوايـا
من تقوت لك ذراعه .. كسرنا لـه ذراعـه
والبشر ماتجهـل انّـا الـى جينـا فدايـا
نقلب الدنيا على راسها في نص ساعـه ..
دام حبك فـي دمانـا .. ويلعـب بالحنايـا
والله ان تبقى على عز . وامجاد . و مناعه
قالوا انّا بدو .. قلنـا علـى روس البرايـا
بدو .. نعرف نقطع الراس لا حان انقطاعه
وان بغينا شمّخ الـروس نجعلهـا وطايـا
ماعلى هالارض مثل السعودي و ارتفاعـه
ياوطن حييـت بالخيـر بعيـون الصبايـا
ما بعد عزتـك عـزة ولا بعـدك رفاعـه

والحقيقه انا من اشد المعجبين بالشاعر مهدي ال حيدر

صح لسانك ولاهنت قصيده رائعه سلمت انملك تحياتي لك

اشكرك دلع عالمرور الرائع

وتقبلي تحياتي!!

صح لسانك ويعطيك الف عااااافيه على قصيده رائعه

----اشكرك ام عبودي

عالمرور الرائع ----

تحياني لك دمتي بود----